Eksperti i Ekonomisë Ergis Sefa, i ftuar në studion e emisionit “Quo Vadis” të moderatores Pranvera Borakaj, ka deklaruar se pronat në Shqipëri po blihen nga të huajt.
Ai argumentoi se vitin e shkuar, ne vendin tonë janë blerë 400 milionë euro prona nga të huajt, kryesisht nga Gjermania, Italia, Anglia dhe Franca. Kjo gjë, sipas Sefës, vështirëson blerjen e një prone nga qytetarët shqiptarë.
Pjesë nga biseda:
Sefa: Banka e Shqipërisë na thotë që investimet e huaja direkte, në mënyrë të ligjshme, 1/3 e tyre ka shkuar për blerje pronash të patundshme në Shqipëri.
Borakaj: Nga cilat vende?
Sefa: Kryesisht nga Gjermania, Italia, Anglia, Franca, ka diçka edhe nga Amerika dhe vende të tjera, ka edhe shtetas të tjerë nga Ukraina, Izraeli. Për ta thënë në shifra, vetëm vitin që shkoi janë blerë mbi 400 milionë euro, që janë blerë prona nga jashtë, këtu. Padyshim një pjesë e tyre mund të jenë edhe shqiptarë që kanë marrë pasaportë të vendeve të huaja, por sa shqiptarë janë me shtetësi të huaja? Pra, nuk janë të gjithë shqiptarë. Blihen kryesisht në zonën e bregdetit, më pak në Tiranë, por rritmi i rritjes është goxha i frikshëm. Dhe problem që do kemi është që për ne vendasit do bëhet gjithnjë e më e vështirë blerja e një prone.
/vizionplus.tv
