U ndje keq gjatë zhytjes, ndërron jetë 30-vjeçarja finlandeze në Vlorë
Një turiste 30-vjeçare nga Finlanda ka humbur jetën pasi u ndje keq gjatë një zhytjeje në zonën e Spitalieres, pranë Orikumit.
Sipas informacioneve paraprake, e reja dyshohet se hasi probleme me furnizimin me oksigjen gjatë zhytjes, duke shfaqur shqetësime.
Si pasojë, ajo u nxor me urgjencë nga uji dhe u transportua drejt Spitalit Rajonal të Vlorës, ndërsa në vendngjarje mbërritën shërbimet e Policisë dhe autoambulanca.
Pavarësisht ndërhyrjes dhe përpjekjeve të ekipit mjekësor për t’i shpëtuar jetën, 30-vjeçarja ndërroi jetë sapo mbërriti në spital.
Burime nga Spitali Rajonal i Vlorës bëjnë me dije se turistja ishte e shoqëruar nga një person tjetër, i cili ndodhet në gjendje të vetëdijshme dhe po merr trajtimin e nevojshëm mjekësor.
Ndërkohë, autoritetet kanë nisur veprimet procedurale për zbardhjen e plotë të rrethanave të ngjarjes. Po ashtu, pritet ekspertiza mjeko-ligjore, e cila do të përcaktojë shkakun e saktë të vdekjes.
