Një biznes i vogël, rrobaqepsi, në bulevardin “Gjergj Fishta” në qytetin e Lezhës është përfshirë nga flakët në rrethana ende të paqarta.
Sapo është konstatuar tymi që dilte nga ambientet e biznesit, i cili ndodhet në katin përdhes të një pallati 10-katësh, janë njoftuar menjëherë shërbimet zjarrfikëse dhe policia. Forcat e emergjencës kanë mbërritur në kohë të shkurtër në vendngjarje dhe kanë bërë të mundur izolimin e zjarrit, duke parandaluar përhapjen e flakëve në pjesën tjetër të godinës.
Falë reagimit të zjarrfikësve, zjarri është vënë nën kontroll brenda pak minutash, ndërsa janë regjistruar dëme materiale në ambientet e biznesit, pa persona të lënduar.
Pas shuarjes së flakëve, grupi hetimor ka nisur veprimet për zbardhjen e plotë të ngjarjes dhe përcaktimin e shkaqeve që sollën rënien e zjarrit.
/vizionplus.tv
