Eksperti i Ekonomisë Ergis Sefa është i ftuar këtë të martë në studion e emisionit “Quo Vadis” të moderatores Pranvera Borakaj.
Ai ka analizuar zhvillimin ekonomik dhe mirëqenien në Shqipëri, duke theksuar se vendi sot paraqitet më mirë se një dekadë më parë, por përballet me një problem të madh, rritjen e pabarazisë.
Sefa tha se duke u bazuar në një indeks të mirëqenies të përshtatur për Shqipërinë, rezulton se vendi ka pasur progres në 10 vitet e fundit.
Pjesë nga biseda:
Sefa: Fondi Monetar Ndërkombëtar dhe OECD-ja kanë një indeks që masin mirëqenien, jo thjesht mbijetesën. Pra, jo thjesht në terma se sa ushqime, por mirëqenien ku fusim edhe elementet e shëndetësisë, arsimit dhe jetëgjatësisë. Dhe këtë e bëjnë kryesisht për vende të mëdha, nuk e bëjnë për Shqipërinë sepse vendet si Shqipëria janë jashtë objektivit të tyre sepse janë shumë të vegjël. Jemi shumë të vegjël, duhet ta pranojmë këtë gjë. Çfarë bëmë ne? Ne morëm modelin e tyre dhe e mbushëm me statistikë, pikat dhe të dhënat për Shqipërinë. Këtë gjë do ta bëjmë çdo gjashtëmujor për të parë se si po progreson Shqipëria dhe pamë 10 vitet e fundit. Ne kemi një rritje në nivelin e mirëqenies absolutisht në total.
Borakaj: Pra, Shqipëria është më mirë sot sesa në 2015-ën?
Sefa: Shqipëria është më mirë sot sesa në 2015-ën në tërësi, por nëse shikojmë kompozitin, pra nëse do të shikojmë ndarjen sipas individëve, ajo që të bën përshtypje është që kemi një rritje të hendekut të pabarazisë. Pra, nëse vendi në total është goxha më mirë se në 2015-ën në aspektin infrastrukturor, në aspektin e parave që kanë hyrë dhe parave që qarkullojnë, individët apo grupet vulnerabël që kanë arritur të përfitojnë janë bërë gjithmonë e më të largët. Pra, ka më shumë njerëz që nuk kanë përfituar sesa njerëz që kanë përfituar.
/vizionplus.tv
