Momente paniku janë regjistruar mbrëmjen e së shtunës (18 korrik) gjatë koncertit të dytë të këngëtarit Bad Bunny në Milano, pasi një stuhi e fortë me breshër, rrufe dhe erëra të fuqishme detyroi organizatorët të ndërprisnin shfaqjen dhe të evakuonin ambientin.
Ylli portorikan po performonte në Ippodromo SNAI La Maura, në kuadër të turneut të tij botëror “Debí Tirar Más Fotos”, kur pak pas orës 21:00 kushtet atmosferike u përkeqësuan ndjeshëm.
Koncerti ishte i dyti dhe i fundit i planifikuar i Bad Bunny në Milano dhe ishte shitur tërësisht. Rreth 80 mijë spektatorë kishin marrë pjesë në secilën prej dy netëve.
Fillimisht, organizatorët u kërkuan fansave të qëndronin në vendet e tyre, duke vlerësuar se moti i keq do të zgjaste pak. Por reshjet u intensifikuan shpejt dhe shiu u shndërrua në një breshër të fuqishëm.
@roshini.ramasamy Bad bunny concert in Milan @Live Nation Italia pls give us a refund 🤡 #badbunny #dtmf #livenation #fail #milano ♬ Saxophones getting louder – Sped Up – AntonioVivald
Për shkak të përkeqësimit të situatës, u mor vendimi për ndërprerjen e menjëhershme të koncertit dhe boshatisjen e zonës së hapur.
Evakuimi u koordinua nga forcat zjarrfikëse, ndërsa një stacion i afërt i metrosë u mbyll përkohësisht për të menaxhuar lëvizjen e turmës dhe për të shmangur grumbullimet e mëdha.
Video të publikuara në rrjetet sociale tregojnë disa spektatorë të lënduar nga kokrrat e mëdha të breshrit, të cilët morën ndihmën e parë nga ekipet e emergjencës në vendngjarje.
@andreea1lea Bad bunny concert 18 July #badbunny #concert #milano #dtmf ♬ original sound – Andreea 🧚🏼♀️
Dëshmitarët përshkruan skena kaosi, me njerëz që vraponin për t’u strehuar nën tendat e lokaleve dhe bareve pranë zonës së koncertit. Disa prej tyre përdorën edhe qese të mëdha plastike si mbrojtje të përkohshme nga breshëri i fortë.
Deri në publikimin e informacionit, organizatorët nuk kishin dhënë ende një njoftim zyrtar nëse do të ketë rimbursim të biletave apo ndonjë formë kompensimi për spektatorët për koncertin e ndërprerë për shkak të kushteve ekstreme të motit.
