Nga Mirdita, atje ku kanë shpërthyer dy vatra zjarri, ministri i Mbrojtjes Ermal Nufi ka bërë me dije se situata është vënë nën kontroll, pa shkaktuar dëme në banesa apo njerëz.
“Kishte një situatë shumë të vështirë me shpërthimin e një vatre zjarri shumë agresive. Menjëherë kanë ardhur forcat bashkia, nga zjarrfikset vendore. Kanë ardhur edhe dy helikopterë për të asistuar në terren të thyer. Situata është nën kontroll dhe është evituar djegia e banesave. Nuk rrezikojmë të kemi banesa apo jetë të humbura. Kërkon angazhim të madh. përditë ka vatra zjarri, por është puna e policisë të identifikojë autorët. Por misionijonë është të mbrojmë jetën njerëzore”, tha ministri Nufi.
Ministri evidentoi edhe situatat më problematike në rang vendi.
“Situata më problematike në rang vendi është në Dukat të Vlorës. Era na ka penalizuar. Terreni është i vështirë. Situatë e vështirë është edhe në malin e Dajtit. Në Dukat janë dy avionë për shuarjen e flakëve”, tha Nufi.
