Kuvendi i Shqipërisë mblidhet sot në seancën e radhës plenare, ku pritet të shqyrtohen një sërë projektligjesh, projektrezolutash dhe raportesh vjetore të institucioneve kushtetuese dhe të drejtësisë. Në të njëjtën kohë, mbetet e paqartë nëse Partia Demokratike do të vijojë bojkotin e seancave parlamentare, ndërsa jashtë godinës është paralajmëruar një protestë qytetare.
Seanca do të nisë me miratimin e procesverbalit të mbledhjes së 16 korrikut dhe paraqitjen e raportit të Këshillit Kombëtar të Integrimit Europian për vitin 2025. Në rendin e ditës është përfshirë edhe projektligji “Për shoqëritë evropiane të bashkëpunimit (SHEB)”, si dhe diskutimi dhe miratimi i projektrezolutave për veprimtarinë gjatë vitit 2025 të institucioneve kryesore të pavarura dhe të sistemit të drejtësisë, mes tyre Avokati i Popullit, KLGJ, KLP, KLSH, Prokuroria e Përgjithshme, SPAK dhe ILD.
Një orë para nisjes së seancës, Grupi Parlamentar i Partisë Demokratike do të zhvillojë një mbledhje në selinë blu, ku pritet të merret vendimi përfundimtar nëse deputetët demokratë do të marrin pjesë në Kuvend apo do të vijojnë bojkotin.
Kreu i Grupit Parlamentar të PD-së, Gazment Bardhi, u ka kërkuar deputetëve të jenë të përgatitur për të dyja skenarët, duke bërë të ditur se vendimi final do të merret vetëm pas mbledhjes së grupit.
Demokratët bojkotuan seancat parlamentare duke nisur nga 2 korriku, pas përshkallëzimit të përplasjeve mes opozitës dhe mazhorancës. Seanca e sotme mund të shënojë rikthimin e tyre në sallën e Kuvendit ose vazhdimin e bojkotit, në prag të mbylljes së punimeve parlamentare për pushimet verore.
Ndërkohë, jashtë Parlamentit është paralajmëruar një protestë qytetare gjatë zhvillimit të seancës plenare, duke shtuar tensionin politik në ditën e fundit të rëndësishme të punimeve të Kuvendit para ndërprerjes së aktivitetit për verën.
/vizionplus.tv
