Kryeministri Edi Rama ka vijuar mbrojtjen e Paketës së Maleve, duke iu përgjigjur kritikave dhe kërkesave për anulimin e saj. Rama tha se heqja e kësaj pakete do të linte pezull mijëra persona që kanë prona të trashëguara në zonat malore. Duke iu referuar kritikave ndaj nismës, kryeministri tha se kjo çështje është paraqitur nga kundërshtarët e tij si një tjetër akt tradhtie.
“Çfarë do të thotë të anulohet Paketa e Maleve? Do të thotë që të gjithë këta njerëz të mbeten pezull. Këtë e thonë të gjithë ata që malin e shohin nga qyteti. Ata që preken nga Paketa e Maleve nuk kërkojnë anulimin, ata mezi e presin. Shitet në tregun e fjalëve si një tjetër akt tradhtie nga unë. Unë tradhtar, temë tjetër kjo”, u shpreh Rama.
Gjatë komunikimit me komentet e qytetarëve, Rama reagoi edhe ndaj një komenti ironik për “Zvicrën e vogël”.
“Si bëhet kjo Zvicra e vogël? Bëhet pikërisht duke u dhënë mundësi njerëzve që të investojnë në harmoni me natyrën dhe të krijojnë mirëqenie pa qenë të detyruar t’i braktisin ato male. Zvicra e madhe është një vend ku, veç shumë gjërave të tjera, në këtë aspekt që ti i referohesh, ka turizëm dhe nuk ka turizëm të njerëzve që marrin një shkop në dorë dhe ecin, por ka turizëm elitar të njerëzve që shkojnë atje dhe konsumojnë shumë para. Prandaj fshatarët e Zvicrës janë të pasur””, tha kryeministri.
Ai solli si shembull zhvillimin e zonës së Thethit, duke thënë se banorët që kanë investuar në turizëm kanë krijuar ekonomi dhe tashmë mbështesin edhe familjarët e tyre jashtë vendit.
“Kjo Zvicra e vogël bëhet duke i dhënë mundësi njerëzve në male të investojnë në harmoni me natyrën dhe të krijojnë mirëqenie pa qenë të detyruar t’i braktisin ato male dhe të punojnë për të tjerët në Londër apo Athinë, apo në Tiranë, Shkodër e Kukës”, deklaroi Rama.
Sipas tij, Paketa e Maleve synon t’u japë mundësi të rinjve që janë trashëgimtarë të zonave malore t’u rikthehen pronave të tyre, jo për nostalgji, por për të zhvilluar ekonomi.
“Kjo e tregon historia e atyre që unë po shkoj sot, që jetojnë dhe bëjnë sukses në Theth. Nga atje çojnë para për familjarë që i kanë në Itali. Kjo është Zvicra e vogël, që kërkon punën dhe kohën e vet, por s’mund të më thotë njeri që është propagandë dhe e paralizueshme. Zvicra e vogël do bahet se s’ban”, përfundoi Rama.
/vizionplus.tv
