Një 57-vjeçar është arrestuar nga policia në Tepelenë pasi u kap duke kultivuar bimë narkotike në një zonë të thellë malore në fshatin Progonat.
Operacioni antidrogë i koduar “Rrjedha” u finalizua nga shërbimet e Komisariatit të Policisë Tepelenë, në bashkëpunim me Prokurorinë, pas një hetimi me metoda proaktive për dokumentimin e veprimtarisë kriminale të personit të dyshuar.
Sipas policisë, i arrestuari, me inicialet I. M., 57 vjeç, banues në Tepelenë, u kap në flagrancë në mes të kanioneve të Progonatit, ku kishte kultivuar në vazo 175 bimë të dyshuara Cannabis Sativa.
Bimët narkotike u asgjësuan, ndërsa materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër për veprime të mëtejshme.
Policia bën me dije se kontrollet kundër kultivimit të kanabisit vijojnë në të gjithë territorin e qarkut, me qëllim evidentimin dhe goditjen e rasteve të tjera të kultivimit të bimëve narkotike.
/vizionplus.tv
