Presidenti i Nikaraguas, Daniel Ortega, ka deklaruar se vendi nuk do të zhvillojë më zgjedhje, me qëllim që opozita të mos ketë mundësi të rikthehet në pushtet. Deklarata e tij ka shkaktuar reagime të forta, ndërsa kritikët e akuzojnë për konsolidim të një regjimi autoritar.
“Harrojeni! Nuk do të ketë më zgjedhje këtu për ta. Nuk do të ketë më zgjedhje këtu, në mënyrë që ata [partitë e opozitës] të përpiqen të marrin qeverinë, të marrin pushtetin”, tha Ortega sipas mediave vendase të cilat ishin detyruar të merrnin pjesënë fjalim.
Ortega, 80 vjeç, i cili ndodhet në pushtet që prej vitit 2007, tha se do të bashkëpunojë me parlamentin e kontrolluar prej tij për të miratuar ligje që, sipas tij, do të krijojnë një “mur” mbrojtës ndaj kundërshtarëve politikë.
Deklarata u bë gjatë ceremonisë zyrtare për përvjetorin e 47-të të revolucionit sandinist të vitit 1979, lëvizje ku Ortega luajti rol në rrëzimin e diktaturës së Anastasio Somozës.
Nicaragua's President Daniel Ortega said the Central American country will no longer hold elections. pic.twitter.com/kVaEouGl6Q
— Open Source Intel (@Osint613) July 21, 2026
“Do të punojmë me Asamblenë Kombëtare dhe institucionet përkatëse për ligje, sepse na duhen ligje që ndërtojnë një mur, një barrierë, kundër puçistëve dhe tradhtarëve që shesin vendin e tyre”, tha Ortega gjatë fjalimit.
Analistët politikë e kanë cilësuar deklaratën si një përshkallëzim të mëtejshëm të goditjes ndaj demokracisë në Nikaragua. Sipas tyre, qeveria e Ortegas dhe bashkëshortes së tij, Rosario Murillo, e cila mban postin e “bashkëpresidentes”, ka eliminuar gradualisht hapësirat për opozitën.
Zgjedhjet presidenciale ishin parashikuar të zhvilloheshin vitin e ardhshëm, por Ortega nuk dha detaje nëse ato do të anulohen apo nëse opozita do të përjashtohet nga gara. Në praktikë, shumë parti opozitare janë ndaluar dhe disa kandidatë presidencialë janë arrestuar gjatë zgjedhjeve të vitit 2021.
Vitet e fundit, regjimi i Ortegas është kritikuar nga organizata ndërkombëtare për shkelje të të drejtave të njeriut. Sipas raportimeve, qindra persona u janë hequr shtetësitë, mijëra organizata joqeveritare janë mbyllur, ndërsa janë goditur edhe universitete dhe media të pavarura. Kritikët thonë se ndryshimet kushtetuese të miratuara së fundmi kanë forcuar më tej kontrollin e çiftit Ortega-Murillo mbi vendin.
