Zjarri i përmasave apokaliptike që përfshiu mbrëmjen e së shtunës Krujën ishte një situatë alarmante e pandodhur më përpara ku një qytet në vendin tonë ishte nën kërcënimin e flakëve.
Këtë të diel, ministri i Brendshëm Besfort Lamallari së bashku me me kreun e policisë Skendër Hita dhe drejtorin e policisë së Tiranës Oliger Torba inspektuan zonat e djegura nga afër. Kreu i uniformave blu vlerësoi faktin që nga përmasat e mëdha të zjarrit fatmirësisht nuk pati viktima, apo dhe banesa të shkrumbuara.
“Arritëm të përballojmë me shumë sukses një situatë tej mase të vështirë. Vërtetë ishte një situatë që nuk ishim ndeshur më përpara me këto përmasa dhe kaq afër qytetit. Por, vendosmëria, përkushtimi, guximi juaj bëri të mundur që ne gjatë këtij operacioni të mos të kishim asnjë humbje jete dhe asnjë djegie banese, apo përfshirje të zjarrit në zonat e qytetit”, tha Hita.
Nga ana tjetër ministri i Brendshem u shpreh se banorët rezistuan duke mos dashur që të braktisin banesat e tyre, por fatmirësisht më pas ata u larguan duke shpëtuar jetën e tyre.
“Rezistencën e kuptueshme që ata patën ëpr të lenë pasuritë të cilën e kanë krijuar me mundim dhe kursimet e një jete, por duke kuptuar më pas dhe sjelljen tuaj shumë njerëzore për ti binduar ata për të shpëtuar jetën, për të lënë banesat e tyre dhe duke iu garantuar atyre që sëbashku me zjarrëfikësit ishim aty për të fikur zjarret dhe ti shpëtonim shtëpitë e tyre”, tha Lamallari.
Ndërkohë që zjarri është lokalizuar dhe nuk përbën rrezik, strukturat e zjarrfikësve dhe emergjencat civile në bashkëpunim me policinë vijojnë punën për fikjen e plotë të fjakëve.
