Zjarr i përmasave të frikshme përfshiu mbrëmjen e të shtunës Malin e Krujës. Flakët u përhapën me shpejtësi, duke iu afruar banesave dhe duke detyruar dhjetëra banorë të largoheshin nga shtëpitë.
Për orë të tëra, zona u mbulua nga flakët, tymi dhe terri, ndërsa banorët e kaluan natën në rrugë, larg banesave të tyre, mes frikës per jeten dhe pasigurise per pronat e tyre.
“Situatë shumë e vështirë. Nga ora 12 u larguam komplet, lamë shtëpinë dhe dolëm në rrugë. Tek farefisi shkuam.”
“Ka qenë zjarr i tmerrshëm, ka vazhduar gjithë natën. Kanë qenë edhe helikopterët deri në 3. Në këtë përmasë nuk mbahet mend të ketë pasur zjarre të tilla.”
“Nuk e dimë si kemi shpëtuar. Lagjja është në rrëzë të malit. Na kanë larguar nga shtëpia. Rreth 50 rrënjë ullinj janë djegur. Pesë orë kemi luftuar me flakët.”
Fatmirësisht, nuk pati persona të lënduar dhe as banesa të djegura. Nga zjarri është shkrumbuar vetëm një magazine.
Flakët dogjën sipërfaqe të mëdha me bimësi dhe iu afruan rrezikshëm fshatrave.
Ndërkohë, në pranga është vënë autori i dyshuar i zjarrvënies, i cili kishte ndezur barishtet pranë shtëpisë së tij, por zjarri doli jashtë kontrollit dhe u përhap, duke rrezikuar banorët e Krujës.
Operacionet për izolimin dhe shuarjen e zjarrit vijuan gjatë gjithë natës, me mbi 200 efektivë të strukturave të emergjencave civile dhe Forcave të Armatosura, si dhe rreth 80 efektivë të MZSH-së.
Prej orës 06:00 të mëngjesit, zjarri është vendosur nën kontroll, por disa vatra vijojnë të jene aktive.
Ndërhyrja nga toka mbetet e pamundur për shkak të terrenit, ndaj zona po monitorohet nga ajri, ndërsa helikopteret vijojne të jetë i angazhuar per te mos lejuar perhapjen e flakeve.
