BE-ja përgatit paketën e 22-të të sanksioneve ndaj Rusisë, planifikon financimin e Ukrainës për vitin 2027

 Bashkimi Evropian po punon për hartimin e paketës së 22-të të sanksioneve ndaj Rusisë, ndërsa njëkohësisht po përgatit një plan të ri financiar për të garantuar mbështetjen ndaj Ukrainës gjatë vitit 2027. Lajmi është bërë i ditur nga agjencia e lajmeve “Reuters”, duke iu referuar deklaratave të presidentes së Komisionit Evropian, Ursula von der Leyen.

Deklarata u bë në Dublin, në kuadër të Samitit të Komunitetit Politik Evropian. Von der Leyen bëri të ditur se të dyja nismat do të prezantohen përpara takimit të radhës të Këshillit Evropian, i cili pritet të mbahet më 26 dhe 27 nëntor.

Sipas saj, Bashkimi Evropian mbetet i vendosur të vazhdojë mbështetjen për Kievin, pavarësisht zhvillimeve në frontin e luftës apo përparimit të negociatave për arritjen e një marrëveshjeje paqeje.

“Ne do ta mbështesim Ukrainën, si në kohë lufte, ashtu edhe në kohë paqeje”, deklaroi presidentja e Komisionit Evropian.