Një marrëveshje e re ushtarake mes Turqisë, Pakistanit dhe Arabisë Saudite synon të forcojë bashkëpunimin e sigurisë në Lindjen e Mesme, në një kohë kur tensionet në rajon mbeten të larta.
Pakti u nënshkrua në Mekë dhe parashikon mbrojtje të ndërsjellë në rast agresioni. Ministri i Jashtëm turk, Hakan Fidan, tha se marrëveshja nuk është e drejtuar kundër Iranit, por pranoi se mekanizmi është, në aspektin teknik, i ngjashëm me Nenin 5 të NATO-s.
Sipas marrëveshjes, një sulm i armatosur ndaj njërit prej vendeve do të konsiderohet sulm ndaj të tre shteteve.
Nisma mund të zgjerohet edhe me shtete të tjera, ndërsa Egjipti është përmendur si një prej vendeve që mund t’i bashkohet në të ardhmen.
Por ndërsa marrëveshja e re hyn në fuqi, Arabia Saudite është përballur me një tjetër kërcënim. Rebelët Houthi në Jemen pretendojnë se kanë sulmuar me dron një objekt të kompanisë saudite të naftës Aramco në Jazan.
Autoritetet saudite konfirmuan se në objekt shpërtheu një zjarr, por thanë se flakët u vunë shpejt nën kontroll dhe nuk pati të lënduar.
Houthit, të mbështetur nga Irani, kanë kryer më herët sulme ndaj infrastrukturës energjetike saudite.
Zhvillimi vjen vetëm pak ditë pas nënshkrimit të paktit të ri dhe e vendos Arabinë Saudite përballë një prove të re sigurie, ndërsa rivaliteti me Iranin dhe konfliktet e lidhura me të vazhdojnë të ndikojnë në rajon.
Për Turqinë, marrëveshja ka një dimension të veçantë, pasi Ankaraja është anëtare e NATO-s.
Qeveria turke këmbëngul se pakti i ri nuk bie ndesh me angazhimet e saj në aleancën perëndimore.
Ndërkohë, krijimi i një mekanizmi të përbashkët mbrojtjeje dhe mundësia e zgjerimit të tij me vende të tjera mund të sjellë një ndryshim të ri në arkitekturën e sigurisë së Lindjes së Mesme.
