Irani ka vendosur kushte të reja për rikthimin e qarkullimit normal në Ngushticën e Hormuzit, ndërsa situata në Lindjen e Mesme vijon të jetë e tensionuar.
Këshilli Suprem i Sigurisë Kombëtare në Teheran ka bërë të ditur se Hormuzi nuk do të rihapet plotësisht për sa kohë Shtetet e Bashkuara nuk ndryshojnë qasjen e tyre. Autoritetet iraniane kërkojnë përfundimin e luftës, heqjen e bllokadës detare dhe tërheqjen e trupave amerikane nga rajoni.
Në listën e kërkesave përfshihen gjithashtu kompensimi për dëmet e shkaktuara nga lufta, heqja e sanksioneve ndaj Iranit dhe zhbllokimi i aseteve iraniane.
Ministri i Jashtëm iranian, Abbas Araghchi, deklaroi se bisedimet për garantimin e lundrimit në Ngushticë kanë avancuar dhe se palët janë pranë një dakordësie, veçanërisht për krijimin e një korridori të posaçëm tranziti.
Megjithatë, ai sqaroi se rikthimi i plotë i lundrimit do të jetë i mundur vetëm pasi të zgjidhen edhe çështjet e tjera të mbetura pezull. Omani, i cili po luan rolin e ndërmjetësit në negociata, e përshkroi klimën e bisedimeve si pozitive dhe konstruktive.
Në të njëjtën kohë, Emiratet e Bashkuara Arabe raportuan se një anije e kompanisë Adnoc u godit gjatë natës nga një raketë iraniane. Sipas autoriteteve, incidenti nuk shkaktoi viktima.
Kompania ka bërë të ditur se që prej fillimit të konfliktit, dhjetëra prej anijeve të saj janë vënë në shënjestër të sulmeve me raketa dhe dronë.
Ndërsa afati 60-ditor i marrëveshjes së arritur në qershor po i afrohet fundit, me pak më shumë se një javë të mbetur, perspektiva për një marrëveshje përfundimtare mbetet e paqartë.
