Shumë turistë po vijnë, por pak po shpenzojnë. Deri në fund të qershorit, vendin e kanë vizituar mbi 5.5 milionë turistë të huaj, ndërkohë që, sipas të dhënave të Bankës së Shqipërisë, shpenzimi mesatar për turist mbetet rreth 430 euro.
“Ka një tendencë të qëndrueshme. Pati një rritje të intensitetit gjatë tremujorit të dytë, por muajt e fundit kanë dhënë sinjale jo shumë të favorshme, sidomos në Tiranë ku është vënë re një rënie e lehtë. Trendi është pozitiv për vendin, por më e rëndësishmja është të kemi një turizëm të qëndrueshëm. Duhet të heqim dorë nga numrat dhe të fokusohemi te cilësia e shërbimit”, thotë eksperti i turizmit, Zak Topuzi.
Sipas ekspertëve, problemi kryesor në Shqipëri nuk është çmimi, por cilësia e shërbimit, një problematikë që vazhdon prej vitesh.
“Shqipëria mbetet ndër destinacionet më të lira në rajon. Greqia rezulton rreth 15-40% më e shtrenjtë, ndërsa Mali i Zi 25-45% më i shtrenjtë. Pra problemi nuk është te çmimi, por te shërbimi që ofrohet. Ka disa hotele që funksionojnë në mënyrë të kënaqshme, por mungojnë kapacitetet e hoteleve me 4 dhe 5 yje, si edhe oferta e strukturuar turistike”, thotë Topuzi.
Aktualisht, Shqipëria po frekuentohet kryesisht nga të rinj që e vizitojnë vendin për herë të parë.
“Tek ne po vjen kryesisht Gjenerata Z, turistë ‘low cost’, të ndikuar nga trendet virale që thonë se Shqipëria duhet vizituar të paktën një herë. Kjo sjell lëvizje të madhe turistësh, por jo domosdoshmërisht rritje të shpenzimeve. Duhet të ndalojmë së numëruari vetëm turistët dhe të fokusohemi te cilësia e shërbimit”, thotë eksperti.
Nëse trendi i turistëve me shpenzim të ulët vijon, ndikimi real i turizmit në ekonomi mund të mbetet më i kufizuar nga sa tregojnë shifrat e hyrjeve.
