Policia Rrugore e Tiranës ka intensifikuar kontrollet ndaj drejtuesve të motomjeteve, me qëllim parandalimin e aksidenteve dhe goditjen e shkeljeve që cenojnë sigurinë në rrugë.
Gjatë kontrolleve të zhvilluara në dy ditët e fundit, efektivët kanë konstatuar 19 shtetas që drejtonin motomjete elektrike pa lejen përkatëse të drejtimit. Për të gjithë këta persona ka nisur procedimi penal për veprën penale “Drejtimi i automjeteve në mënyrë të parregullt”, ndërsa motomjetet janë sekuestruar.
Në total, Policia Rrugore ka vendosur 530 masa administrative për shkelje të ndryshme të rregullave të qarkullimit.
Shkeljet e konstatuara janë:
- 371 masa për mosvendosjen e kaskës mbrojtëse;
- 76 masa për qarkullim në korsitë e dedikuara për biçikleta dhe në hapësirat e këmbësorëve;
- 28 masa për kryerjen e manovrave të rrezikshme dhe mosrregullimin e shpejtësisë në qendrat e banuara;
- 21 masa për shkaktim zhurmash përmes sistemit të shkarkimit të gazrave;
- 18 masa për motomjete pa shenja dalluese ose targa;
- 10 masa për tejkalim të shpejtësisë së lejuar;
- 6 masa për drejtim pa lejen përkatëse të drejtimit.
Sipas Policisë Rrugore, kontrollet janë intensifikuar në vijim të shqetësimeve të shumta për manovrat e rrezikshme të kryera nga drejtuesit e motomjeteve, të cilat përbëjnë rrezik si për drejtuesit e tyre, ashtu edhe për përdoruesit e tjerë të rrugës.
Kontrollet do të vijojnë në mënyrë të pandërprerë, me fokus parandalimin e ngjarjeve rrugore dhe rritjen e sigurisë në rrugët e Tiranës.
Policia Rrugore u bën apel drejtuesve të motomjeteve të respektojnë rregullat e qarkullimit, të pajisen me leje drejtimi, të përdorin kaskën mbrojtëse dhe të shmangin manovrat e rrezikshme.
