Vizita e Presidentit ukrainas Volodymyr Zelensky në Beograd dhe deklarata e tij se Ukraina nuk e ndryshon qëndrimin për mosnjohjen e Kosovës kanë sjellë reagimin e Tiranës zyrtare.
Shqipëria e vlerëson dialogun mes Ukrainës dhe Serbisë, por paralajmëron se çështja e Kosovës nuk mund të vendoset në të njëjtin ekuacion me luftën në Ukrainë.
“Çdo përpjekje për të vendosur një paralele ose për të krijuar një ekuacion midis Kosovës dhe çdo situate tjetër ndërkombëtare është e gabuar, oportuniste dhe thellësisht çorientuese”, thuhet në reagim.
Ministria e Jashtme e Shqipërisë rikthen në vëmendje edhe opinionin e Gjykatës Ndërkombëtare të Drejtësisë, duke theksuar se shpallja e pavarësisë së Kosovës nuk ka shkelur të drejtën ndërkombëtare.
“Rasti i Kosovës qëndron mbi themelet e veta historike, politike dhe ligjore. Me kërkesë të Asamblesë së Përgjithshme të OKB-së, Gjykata Ndërkombëtare e Drejtësisë ishte e prerë: Shpallja e pavarësisë së Kosovës nuk shkeli të drejtën ndërkombëtare”, thuhet në reagim.
Ndërsa për luftën në Ukrainë, Shqipëria thekson se agresioni rus përbën shkelje të rëndë të Kartës së Kombeve të Bashkuara dhe të së drejtës ndërkombëtare.
Tirana e përdor këtë reagim edhe për të ritheksuar mbështetjen e saj për Kosovën, duke kërkuar që pavarësia e saj të pranohet si realitet dhe që Prishtina e Beogradi të ecin drejt normalizimit të marrëdhënieve.
“Normalizimi i marrëdhënieve mes tyre, që në fund çon në njohje të ndërsjellë, nuk do ta dobësonte Serbinë. Përkundrazi, do të ndihmonte në mbylljen e një prej kapitujve më të dhimbshëm të historisë së kohëve të fundit të rajonit tonë dhe do të hapte rrugën për pajtim të vërtetë, marrëdhënie të fqinjësisë së mirë dhe paqe të qëndrueshme”, thuhet në reagimin e MEPJ.
Në përfundim, Shqipëria e cilëson vizitën e Zelenskyt në Serbi si një mundësi për afrimin e Beogradit me Evropën dhe largimin e tij nga ndikimi rus, por nënvizon se Ballkani Perëndimor duhet të ecë përpara dhe jo të rikthehet pas.
