Koreanishtja, japonishtja dhe arabishtja i shtohen këtë vit ofertës akademike për maturantët që duan të studiojnë këto gjuhë. Programi i ri Bachelor në Orientalistikë zgjeron ofertën e fakultetit të gjuhëve të huaja.
“Përmbledh gjuhët që nga koreanishtja e largët , japonishtja, dhe arabe. Është një alternativë e re një rrugë e re studimi që iu jepet maturanteve të cilët kanë interes për këtë gjuhë apo i njohin pak këto gjuhë dhe duan të investojnë në studimet bachelor universitar”, thotë Adriatik Derjaj, përgjegjës i departamentit të gjuhëve sllave dhe ballkanike.
Arabia Saudite, Emiratet e Bashkuara Arabe apo Katari janë ndër vendet te cilat sipas drejtuesit të deparamentit, kanë shtuar interesin e të rinjve për të mësuar gjuhët dhe kulturat e këtyre rajoneve.
“Shumë kompani, kryesisht linjat ajrore, kanë kërkuar studentë poliglotë, që njohin gjuhë si arabishtja apo koreanishtja. Ne po i përgjigjemi kësaj kërkese me këtë program të ri studimi”, thotë Derjaj.
Por njohja e gjuhëve të huaja nuk shihet vetëm si një mundësi për të punuar jashtë vendit. Objektivi është që të diplomuarit të gjejnë hapësira punësimi edhe në Shqipëri, ku prania e kompanive ndërkombëtare dhe zhvillimi i sektorëve të ndryshëm kanë rritur kërkesën për profesionistë që zotërojnë disa gjuhë.
“Janë një pasaportë për t’u lidhur me botën, si jashtë ashtu edhe brenda. Një dritare e madhe është turizmi, një lokomotivë e ekonomisë shqiptare, ku ka nevojë për përkthyes, operatorë, menaxherë, ciceronë dhe udhërrëfyes. Një student poliglot, që njeh dy apo tre gjuhë, ka një alternativë shumë të mirë punësimi sapo diplomohet”, shton Derjaj.
Për maturantët që zgjedhin programin e ri Bachelor në Orientalistikë janë parashikuar 30 kuota.
