Një ngjarje e pazakontë është regjistruar në një nga fluturimet e SkyWest me destinacion Detroit.
Një pasagjerë, shqiptar, u konfliktua me stjuardesën dhe tentoi të hapte derën e avionit gjatë fluturimit. Sipas Administratës Federale të Aviacionit (FAA), avioni bëri ulje emergjente.
Në momentin e uljes, autoritetet arrestuan 23-vjeçarin Mario Nikprelajn. Siç shkruajnë mediat e huaja, në bord ndodheshin gjithsej 67 pasagjerë.
Fluturimi kishte nisur nga Omaha në orën 17:30 me orën lokale dhe bëri ulje në Aeroportin e Iowa-s Lindore rreth një orë më vonë.
Sipas një deklarate të Policisë së Cedar Rapids, Nikprelaj përballet me akuza për prishje të rendit, shkelje të taksave për substanca të kontrolluara dhe ngacmim në shkallën e parë.
Një prej pasagjerëve, J. Spencer, shkroi në platformën X: U desh të devijonim në Cedar Rapids sepse ky njeri vendosi të hapte derën e emergjencës dhe më pas u përlesh me ekuipazhin dhe pasagjerë të tjerë. Ndërsa avioni po hynte në pistë për ngritje, ai u çua në këmbë dhe hoqi rripin e sigurimit. Ekuipazhi ndërhyri sërish.
Ndërkohë Policia po shqyrton ngritjen e akuzave të tjera ndaj tij.
