Një 54-vjeçar është proceduar në gjendje të lirë nga Policia në Lezhë, pasi dyshohet se ka shkaktuar një shkrepje të pavullnetshme të një arme zjarri brenda ambienteve të Spitalit Rajonal të Lezhës.
Sipas policisë, shtetasi G. N. kishte shkuar në spital për të marrë mjekim për shkak të problemeve shëndetësore, ndërsa gjatë qëndrimit aty, nga çanta e krahut dyshohet se i ka rënë një armë zjarri, e dyshuar pistoletë, duke shkaktuar shkrepjen aksidentale.
Në vijim të hetimeve, policia ka shpallur në kërkim djalin e tij 18-vjeçar, i cili dyshohet se ka fshehur armën me qëllim pengimin e zbulimit të së vërtetës. Gjithashtu është proceduar penalisht në gjendje të lirë edhe një punonjës i spitalit, shtetasi A. V., 54 vjeç, me detyrë punonjës IT, pasi dyshohet se ka kryer veprime që pengojnë hetimin.
Policia bën me dije se hetimet vijojnë për zbardhjen e plotë të rrethanave të ngjarjes dhe dokumentimin ligjor të përgjegjësive të personave të përfshirë.
/vizionplus.tv
