Kryeministri Edi Rama, i shoqëruar nga ministrat e kabinetit qeveritar, zhvilloi një takim me efektivët e shërbimit zjarrfikës dhe trupat e Emergjencave Civile, në kuadër të përgatitjeve për përballimin e situatës së zjarreve gjatë sezonit veror.
Gjatë fjalës së tij, Rama solli në vëmendje situatën e rënduar nga zjarret në Francë dhe Spanjë, duke shprehur solidaritet me ekipet e emergjencave dhe banorët e prekur. Ai tha se mbi 320 mijë persona kanë lënë shtëpitë e tyre në këto vende, ndërsa vetëm në orët e fundit mijëra banorë janë evakuuar nga zonat e rrezikuara.
Rama:
Teksa ne jemi këtu të mbledhur në këtë hangar të helikopterëve, në Francë e Spanjë mbi 320 mijë njerëz kanë lënë shtëpitë e tyre dhe vetëm në orët e fundit 55 mijë banorë janë evakuuar nga zona përreth Bordosë, ku flakët kanë hyrë deri në lagjet e periferisë.
Në Spanjë, 60 mijë njerëz kanë ikur nga zjarri, që thuhet se është zjarri më i rëndë që ka njohur Madridi në histori. Vetëm në Francë, hektarët e djegur kanë kaluar shifrën 200 mijë. Një sipërfaqe më e madhe se Bashkia e Tiranës.
Kolegët tuaj francezë dhe spanjollë janë në një front ferri prej ditësh. Të nxirë nga bloza, të shtrirë në tokë buzë rrugës, në pamje të paimagjinueshme të sakrificës njerëzore në shërbim të jetës dhe natyrës.
Jam i bindur se askush nga ju nuk i sheh ata si të huaj dhe nuk i sheh ato lajme si lajme nga bota, sepse ajo është pamja e një lufte të përbashkët, në një klimë të përbashkët, gjatë sezonit të një vere të përbashkët. Kur sheh qindra mijëra njerëz që ikin të lemerisur me çfarë mund të marrin nëpër duar, është njësoj sikur të shohësh njerëzit tanë, për shkak se rreziku dhe sfida është e njëjtë.
Prandaj dua që nga kjo sallë t’ju përcjell një shprehje solidariteti të gjithë kolegëve tuaj në Francë e Spanjë.
Ne e kemi bërë edhe në të shkuarën, falë jush, dhe jemi gati ta bëjmë sërish nëse na kërkohet të japim ndihmën tonë modeste në kuadër të dhe të përgjigjemi në rast se na kërkohet, siç jemi përgjigjur edhe më parë. Dhe siç na janë përgjigjur edhe miqtë evropianë kur ne kemi qenë në të njëjtin hall.
/vizionplus.tv
