Tre persona humbën jetën dhe katër të tjerë mbetën të plagosur nga të shtënat me armë zjarri në qendër të Seattle-it ne Shtetet e Bashkuara në një prej zonave më të frekuentuara të qytetit.
Mes të plagosurve është edhe një fëmijë vetëm dy vjeç, i cili sipas autoriteteve ndodhet në gjendje të stabilizuar.
Ngjarja ndodhi gjatë një festivali të madh kulinar, pranë monumentit të njohur “Space Needle”, ku mijëra qytetarë ishin mbledhur për të marrë pjesë në aktivitet.
Të shtënat u dëgjuan rreth orës 18:00 me orën lokale, duke shkaktuar panik mes pjesëmarrësve. Njerëzit nisën të vraponin në përpjekje për t’u larguar nga vendi i ngjarjes.
Sipas Policisë së Seattle-it, dy persona dyshohet se po qëllonin ndaj njëri-tjetrit, duke e kthyer zonën e mbushur me civilë në skenë të një përplasjeje të armatosur me pasoja tragjike.
Forcat e rendit arrestuan një prej të dyshuarve menjëherë pas ngjarjes, ndërsa personi i dytë arriti të largohej dhe vijon të jetë në kërkim nga policia. Hetuesit po punojnë për të zbardhur rrethanat e plota të sulmit dhe motivet që çuan në shkëmbimin e zjarrit.
Ngjarja ka tronditur opinionin publik në Shtetet e Bashkuara. Guvernatori i shtetit të Uashingtonit u shprehu ngushëllimet familjarëve të viktimave, ndërsa një kongresmene nga Seattle e dënoi atë që e cilësoi si një akt të pakuptimtë dhune.
Autoritetet kanë bërë thirrje për këdo që ka informacion apo pamje filmike nga vendi i ngjarjes të bashkëpunojë me hetuesit, ndërsa kërkimet për kapjen e të dyshuarit të dytë vazhdojnë.
