Kira Cousins, 23-vjeçarja nga Airdrie e Skocisë, ka folur për herë të parë për skandalin që bëri xhiron e botës, pasi mashtroi ish-partnerin dhe familjarët duke i bërë të besonin se kishte lindur një vajzë, ndërsa në të vërtetë kishte përdorur një kukull plastike të ngjashme me një bebe.
Kira kishte pretenduar për muaj të tërë se ishte shtatzënë me vajzën që do ta quante Bonnie-Leigh Joyce. Ajo përdori një bark artificial, publikoi foto ekografish, ndau në rrjete sociale përgatitjet për ardhjen e bebes dhe organizoi edhe një festë madhështore për zbulimin e gjinisë së fëmijës, ku ishte fotografuar së bashku me partnerin e atëhershëm, Jamie Gardner.
Në intervistën e saj të parë, Kira pranoi se ajo që bëri ishte e gabuar, por tha se nuk kishte mundur t’i tregonte Jamie-t se kishte humbur shtatzëninë. “Unë e humba një fëmijë. U përpoqa t’i tregoja kur e humba për herë të parë. Kam ende mesazhe në telefon ku i shkruaja: ‘Jamie, duhet të ulemi të flasim’, por nuk munda të flisja me të për asgjë”, tha ajo.
Ajo shtoi se frika dhe tronditja e bënë që situata të dilte jashtë kontrollit. “Mund ta pranoj dhe të them: ‘Jo, nuk duhej të kisha përdorur një kukull’, por në të njëjtën kohë, askush nuk e di se si ishte marrëdhënia jonë”, u shpreh Kira.
Sipas saj, një nga arsyet që e shtyu të vazhdonte mashtrimin ishte frika nga reagimi i Jamie-t. “Si i tregon dikujt se ke kaluar gjithë atë gjë vetëm?”, tha 23-vjeçarja, duke pretenduar se më herët ata kishin pasur probleme në marrëdhënie dhe se Jamie fillimisht nuk kishte dashur një fëmijë.
Nga ana tjetër, Jamie Gardner tha se ai kishte besuar plotësisht se ishte bërë baba. “Nëse do ta kisha ditur ndonjëherë që ishte vërtet një kukull, do të isha larguar shumë më herët. Nuk kam asnjë ide se çfarë ka ndodhur në të vërtetë”, deklaroi ai.
Gjatë muajve të mashtrimit, Kira publikoi foto të rrobave dhe dhuratave për beben, përfshirë një karrocë dhe sedilje makine me vlerë rreth 1 mijë paund. Ajo pretendoi gjithashtu se kontrollet mjekësore kishin zbuluar një problem me zemrën e fëmijës dhe shpërndau materiale që dyshohet se ishin krijuar me inteligjencë artificiale, duke treguar “lëvizjet e bebes” në bark.
Kira tha se e mbante kukullën larg familjarëve dhe nuk lejonte askënd ta prekte. “E gjithë familja ime pyeste: ‘Çfarë po ndodh? A është ajo në depresion?’, sepse nuk lejoja askënd pranë asaj kukulle, vetëm mua dhe Jamie-n”, tregoi ajo.
Mashtrimi u zbulua në tetor, pasi familjarët nisën të dyshonin sepse nuk kishin dëgjuar kurrë të qante “bebja”. Sipas raportimeve, ishte nëna e Kiras ajo që gjeti kukullën me pamje realiste të fshehur në dhomën e saj. Kira më pas pretendoi se vajza Bonnie-Leigh kishte ndërruar jetë.
Pas zbulimit të skandalit, Kira tha se kishte komunikuar disa herë me Jamie-n. “Nuk e kuptoj as çfarë jemi tani. Nuk e urrejmë njëri-tjetrin, por as nuk e duam njëri-tjetrin”, tha ajo.
Ndërkohë, Jamie ka refuzuar të marrë pjesë në një dokumentar televiziv për këtë histori dhe ka deklaruar: “Dua të largohem sa më shumë prej saj. Thjesht dua të vazhdoj jetën time.”
/vizionplus.tv
