Kreu i Partisë Demokratike, Sali Berisha, kundërshtoi mënyrën e ndjekur nga mazhoranca për miratimin e marrëveshjes së huas me Shtetet e Bashkuara të Amerikës, duke deklaruar se opozita është pro financimit për mbrojtjen, por nuk do të mbështesë një procedurë që sipas tij është antikushtetuese.
Në një deklaratë për mediat jashtë ambienteve të Kuvendit, Berisha akuzoi qeverinë se po përpiqet të kalojë marrëveshjen prej 302 milionë dollarësh me procedurë të përshpejtuar, duke pretenduar se nuk janë respektuar afatet kushtetuese.
“Ne nuk votojmë në procedura antikushtetuese në mënyrë absolute. Edhe njëherë, ne jemi pro kredisë dhe shprehim mirënjohje, por kërkojmë që kjo procedurë të bëhet në përputhje me Kushtetutën,” tha Berisha.
Sipas tij, marrëveshja është dorëzuar nga pala amerikane disa muaj më parë dhe qeveria shqiptare e ka sjellë në Kuvend vetëm në fund të korrikut.
Berisha akuzoi kryeministrin Edi Rama edhe për qëndrimin ndaj NATO-s, duke pretenduar se qeveria ka larguar flamurin e Aleancës nga institucionet dhe se buxheti për mbrojtjen është më i ulët nga sa deklarohet.
“Shqipëria është vend anëtar i NATO-s dhe flamuri i NATO-s duhet të shfaqet në institucionet e vendit. E vërteta është që buxheti për NATO-n sot është 1.3 për qind,” deklaroi Berisha.
Ai tha se Partia Demokratike kishte propozuar që marrëveshja të ndiqte procedurën e zakonshme parlamentare dhe të votohej në një seancë tjetër, duke akuzuar mazhorancën se po shmang rregullat kushtetuese.
