Një 38-vjeçar është arrestuar nga Policia në Dibër, pasi dyshohet se ka qëlluar me armë zjarri në ajër për të kanosur disa persona.
Në pranga ka rënë shtetasi F. I., 38 vjeç, banues në fshatin Pollozhan, ndërsa është proceduar penalisht në gjendje të lirë edhe një 19-vjeçar me inicialet K. I., i dyshuar si bashkëpunëtor në ngjarje.
Sipas hetimeve paraprake, ngjarja ka ndodhur mbrëmjen e 24 korrikut 2026 në bulevardin “Elez Isufi” në Dibër. Dyshohet se 38-vjeçari, në bashkëpunim me 19-vjeçarin, ka qëlluar në ajër me armë zjarri për të kanosur gjashtë persona, banues në Peshkopi dhe Pollozhan.
Ndërkohë, policia ka nisur procedim penal për 8 persona të tjerë për veprën penale “Moskallëzimi i krimit”, pasi dyshohet se kishin dijeni për ngjarjen, por nuk e kanë raportuar atë në polici.
Gjithashtu, një 44-vjeçar nga Pollozhani është proceduar penalisht, pasi dyshohet se ka kryer veprime që pengojnë zbulimin e së vërtetës.
Materialet procedurale i janë referuar Prokurorisë së Dibrës për veprime të mëtejshme hetimore.
