Kuvendi mblidhet sot në seancë plenare për të shqyrtuar projektvendimin për caktimin e anëtarëve zëvendësues në përbërjen e komisioneve të përhershme parlamentare. Seanca, e parashikuar të nisë në orën 10:00, përfshin gjithashtu miratimin e procesverbalit të mbledhjes së 23 korrikut dhe njoftime, ndërsa shërbimet e Kuvendit kanë përgatitur dokumentacionin për shqyrtim.
Paralelisht me zhvillimin e seancës, jashtë godinës së Kuvendit po mbahet protestë, pas tensioneve dhe akteve të dhunës të regjistruara në seancën e kaluar. Për të garantuar sigurinë, godina është rrethuar me gardh metalik dhe në zonë janë angazhuar forca të shumta policie, nga Ministria e Brendshme deri në pedonale dhe te Xhamia e Namazgjasë në “Rrugën e Elbasanit”.
Mbledhja e fundit plenare u shoqërua me përplasje të forta mes mazhorancës dhe opozitës, pas rrëzimit të kërkesës së PD-së për zgjatjen e afatit të komisionit të posaçëm për reformën territoriale. Seanca u ndërpre katër herë, ndërsa opozita bllokoi punimet dhe kërkoi dorëheqjen e kryeministrit Edi Rama. Deputeti Gazment Bardhi u përjashtua pasi hodhi ujë në drejtim të kryeministrit, ndërsa mazhoranca miratoi projektaktet dhe vendosi zhvillimin e një tjetër seance plenare më 30 korrik.
Rendi i ditës
I. Mbledhjen e Kuvendit në seancë plenare në datën 27.7.2026, ora 10:00.
II. Rendi i ditës i seancës plenare është si më poshtë:
1. Miratimi i procesverbalit të seancës plenare të datës 23.7.2026.
2. Njoftime.
3. Projektvendimi “Për një ndryshim në vendimin nr. 87/2026, “Рër caktimin e anëtarëve zëvendësues në përbërjen e komisioneve të përhershme të Kuvendit”, i ndryshuar”.
III. Ngarkohen shërbimet e Kuvendit për publikimin e rendit të ditës të seancës plenare, njoftimin e anëtarëve të Kuvendit me anë të mjeteve të komunikimit elektronik, si dhe përgatitjen e dokumentacionit parlamentar që do të shqyrtohet.
IV. Ky urdhër hyn në fuqi menjëherë.
