Policia e Shkodrës ka vijuar me intensitet operacionin e koduar “Koordinata”, të ndërmarrë kundër kultivimit të bimëve narkotike në qarkun Shkodër. Gjatë kontrolleve të kryera në territorin e pesë njësive administrative, janë gjetur dhe asgjësuar në total 1447 bimë të dyshuara narkotike të llojit Cannabis Sativa.
Në territorin e njësive administrative Pult dhe Shalë, shërbimet e Komisariatit të Policisë Shkodër asgjësuan 495 bimë narkotike, ndërsa u referuan materialet në Prokurori dhe nisi procedimi penal në gjendje të lirë për veprën penale “Shpërdorimi i detyrës”, për katër kryetarë fshatrash:
Y. D., kryetar i fshatit Brucaj
M. M., kryetar i fshatit Nicaj
N. M., kryetar i fshatit Abat
D. V., kryetar i fshatit Pecaj
Ndërkohë, në njësitë administrative Kastrat dhe Qendër, Policia e Malësisë së Madhe asgjësoi 365 bimë kanabis, ndërsa në territorin e njësisë administrative Temal, shërbimet e Policisë së Vaut të Dejës gjetën dhe asgjësuan 587 bimë narkotike.
Policia bën të ditur se vijon puna për identifikimin dhe ndjekjen penale të autorëve të kultivimit, ndërsa operacioni “Koordinata” po shtrihet në të gjithë territorin e qarkut Shkodër.
/vizionplus.tv
