Ministri i Kulturës, Turizmit dhe Sportit, Blendi Gonxhja, i ftuar këtë të martë në Quo Vadis të moderatores Pranvera Borakaj në Vizion Plus, foli edhe për ndikimin e protestës te turizmi.
Ai tha se, fatmirësisht, në Shqipëri ende turizmi i organizuar nuk është në nivele shumë të larta dhe kjo bëri që të kishte pak anulime.
Pjesë nga biseda:
Borakaj: Në fillim të vitit folët për 3.7 milionë vizitorë të huaj. Në qershor pati rënie. A keni ju shifra nga bizneset që ju thonë se kishin rezervime, por për shkak të situatës u janë anuluar?
Gonxhja: Ne kemi një dinamikë turizmi të tillë që, për shkak të ecurisë së turizmit ndër vite, turizmi i organizuar nuk është në nivelet e vendeve të zhvilluara. Shqipëria nuk është Italia, Spanja apo Franca. Është një vend i dëshiruar, një atraksion interesant, ka një reputacion të mirë, por nga pikëpamja e të gjitha kushteve, Shqipëria lufton me limitet e veta.
Ne kemi ende një turizëm të organizuar të dobët. Dua të them se, po të kishim një turizëm të organizuar me turoperatorë, që programojnë dhe bëjnë shitje pak a shumë si linjat ajrore, të cilat mbajnë edhe riskun, kjo gjë në vendin tonë reflektohet vetëm në rreth 10% të volumit.
Për shkak se jemi ende në nivele fillestare të turizmit të organizuar, i cili është turizmi më i qëndrueshëm, që e planifikon dhe e koordinon gjithë ofertën, si edhe është turizmi që i lë klientët më të kënaqur, për fat, nga e keqja jonë, jemi ndikuar pak nga anulimet e këtij lloji organizatorësh. Po të ishte pesha e këtij segmenti më e madhe, do të ishim ndikuar shumë më tepër.
Zbuluam po ashtu se kemi edhe turizëm momental. Kemi vende të rajonit që ndikohen dhe kanë alternativa të tjera nëse ka probleme në Greqi apo në Turqi. Shqipëria është ende në kulmin e fazës së njohjes. Ndërkohë që pjesa më e madhe e botës është tashmë e konsoliduar si destinacion turistik, ne vazhdojmë të udhëtojmë në fazën e prezantimit dhe njohjes së vendit.
