Ministri i Kulturës, Turizmit dhe Sportit, Blendi Gonxhja, duke folur për protestën në Bulevard, theksoi se priste që ata të uleshin në tryezën politike.
I pyetur nga moderatorja Pranvera Borakaj në Quo Vadis në Vizion Plus nëse priste që protestuesit të krijonin parti politike, Gonxhja tha se ata mund të përfshiheshin edhe te partitë ekzistuese, pasi do ta ndihmonin shumë opozitën.
Pjesë nga biseda:
Borakaj: Jeni zgjuar ju nga protesta?
Gonxhja: Në një vend ku nuk kemi opozitë, ka përplasje. Pa pasur një amortizim, përplasen pllakat. Përplasja, qoftë edhe në një cep të saj, ka krijuar një krisje, e cila ka dhënë 12.2 herë më pak rritje të turistëve të huaj në qershor.
Borakaj: Ia vendosni fajin vetëm protestës?
Gonxhja: Unë nuk jam kaq çilimi sa t’ia vendos fajin vetëm protestës. Por nuk mund të mos e shohim. Kjo që po ndodh nuk na ndihmon për atë që është qëllimi ynë, që janë nevojat tona. A është kjo rruga për ta nxjerrë nga shinat lokomotivën e zhvillimit të turizmit? A duhet të shkojmë të bëjmë “review” negative? Jo, kjo është e papranueshme. Duhet të shkojmë drejt një debati.
Borakaj: Po ju e refuzoni?
Gonxhja: Që nga dita e dytë kërkohet të bjerë qeveria, sistemi, gjithçka. Si funksionon kjo? Çfarë standardi do të vendosim? Nëse i vëmë ata përballë dhe i pyesim se çfarë standardi po vendosim, unë kam vetëm 25 mijë votues. Çfarë duhet të bëjmë? Që në gusht të dalim ne në protestë dhe të themi: “Ikni ju, do vijmë ne”? Standardi që kemi vendosur ne është që të jemi në tavolinën e spektrit politik në zgjedhjet vendore.
Borakaj: Prisnit të krijonin parti?
Gonxhja: Mund të përfshiheshin në partitë aktuale të opozitës.
Borakaj: Po socialistët e zhgënjyer?
Gonxhja: Natyrisht që këtu ka shumë zëra, vlera, prandaj fjalimi i kryeministrit fliste për njerëz kreativë, njerëz që flasin bukur. Nga ana tjetër, gjithë këta shqiptarë të anatemuar që thuhet se duhet të zhduken. Këta që duhet të zhduken, sipas tyre, janë administrata shqiptare.
Borakaj: Politikanët e korruptuar.
Gonxhja: Po kudo jemi ne në mazhorancë. Kush jemi ne? Janë të afërmit e atyre që janë në Bulevard, janë gjaku ynë. Jemi ne, jemi ne shqiptarët, nuk ka njerëz që kanë ardhur nga Marsi në ministri. Nuk mund të lejojmë që gjuha e urrejtjes të të kaplojë. Gjuha jote mund të të japë reagim instinktiv, por nuk duhet të lejojë që të zëvendësohet nga gjuha e urrejtjes. Ekstremizmi të ngushton, të rrudh dhe nuk të çon përpara.
