Mungesa e drejtorit të përgjithshëm se policisë së shtetit, Skëndër Hita, në seancën dëgjimore të Komisionit për Reformën Zgjedhore solli përplasje mes deputetëve të mazhorancës dhe opozitës.
Demokratet kundërshtuan raportimin e zëvëndësdrejtorit, Sokol Bizhga me argumentin se çështjet e ngritura lidhen drejtpërdrejt me përgjegjësitë e drejtimit të institucionit.
“Duhet të kishte ardhur drejtori i Policisë së Shtetit. Policia ka qenë problem gjatë periudhës së zgjedhjeve. Ka veprime që krijojnë probleme në fushën e zgjedhjeve dhe për këtë duhet të japë përgjigje drejtori”, tha bashkëdrejtuesi i Komisionit, deputeti demokrat Oerd Bylykbashi.
“Drejtori i Policisë nuk mund ta delegojë fjalën e tij. Ai është personi i duhur dhe duhet të përballet me rëndësinë që kanë këto çështje. Kemi momente konkrete kur policia ka qenë e paqenë gjatë procesit zgjedhor”, tha Gent Strazimiri, deputet i PD.
Ndonëse socialistët ishin dakord me pretendimet e të djathtëve, Damian Gjiknuri tha se Bizhga ka qenë përgjegjës për policinë gjatë periudhës së zgjedhjeve.
“Bizhga ka njohuri sepse ka qene nder vite pjese e policise se shtetit. Po te doni edhe e nderpres mbledhjen. Por Hita nuk ka detyrim qe te vije te raportoje. Ne nuk jemi komisioni hetimor qe ti marrim me detyrim. Patjeter qe per perkedhelje sedre e mira do te ishte te vinte Hita”, tha Gjiknuri, bashkëdrejtues i Komisionit të Reformës Zgjedhore.
Mungesën e Hitës, Bizhga e justifikoi duke thënë se drejtori i përgjithshëm nuk ka qenë në detyrë gjatë zgjedhjeve të majit 2025.
“Kam qenë unë përgjegjësi për procesin zgjedhor të vitit 2025. Kemi kaluar disa procese të cilat disa i bëmë gabim, por gjatë rrugës ne jemi përmiresuar”, tha Bizhga.
Megjithatë, palët vendosën për shtyrjen e mbledhjes në një moment tjetër duke kërkuar që të raportojë Skënder Hita.
