Kryeministri i ri i Britanisë, Andy Burnham, ka premtuar uljen e çmimit të biletës së autobusit për një udhëtim në 2 paund, në kuadër të paketës së masave për të lehtësuar krizën e kostos së jetesës.
Nisma, e cila do të hyjë në fuqi nga janari, pritet të ulë çmimin e biletave deri në një të tretën. Sipas qeverisë britanike, skema do të mbështetet me një fond prej 454 milionë paundësh, i siguruar përmes rishpërndarjes së fondeve në buxhetin e Ministrisë së Sigurisë Energjetike dhe Emetimeve Zero.
“Që nga dita e parë kam premtuar të ndërtoj një vend për të gjithë. Kjo do të thotë më shumë lidhje mes komuniteteve, akses më të mirë në mundësi dhe më pak barrë financiare për qytetarët”, deklaroi Burnham.
Një ditë më parë, qeveria britanike njoftoi edhe heqjen e TVSH-së nga faturat e energjisë elektrike për familjet, masë që do të zbatohet nga 1 tetori.
Kostoja e kësaj politike do të mbulohet nga anulimi i programit qeveritar për identitetin dixhital, me një vlerë prej 1.8 miliardë paundësh.
Kryeministri Burnham ka bërë të ditur se në ditët në vijim do të shpallë edhe masa të tjera, me synimin që qytetarët, veçanërisht ata me të ardhura më të ulëta, të ndiejnë sa më shpejt efektet e politikave të reja ekonomike.
/vizionplus.tv
