Një telefon celular është gjetur sërish në qelinë ku mbahet i burgosuri Laert Haxhiu në Institucionin e Ekzekutimit të Vendimeve Penale në Drenovë.
Burime të sigurisë bëjnë me dije se kontrolli është zhvilluar rreth orës 06:00 të mëngjesit, gjatë një operacioni rutinë të ushtruar nga autoritetet e burgut në sektorin e sigurisë së lartë.
Sipas të njëjtave burime, gjatë kontrollit në qelinë ku ndodhet Laert Haxhiu, së bashku me të burgosur të tjerë, është konstatuar një telefon celular, i cili dyshohet se përdorej nga Haxhiu. Megjithatë, deri në këtë fazë nuk është konfirmuar zyrtarisht se kujt i përket pajisja.
Pas sekuestrimit, telefoni është dërguar pranë Prokurorisë së Posaçme kundër Korrupsionit dhe Krimit të Organizuar (SPAK), ku do t’i nënshtrohet ekspertizës për të verifikuar përmbajtjen, komunikimet e mundshme dhe përdoruesin e tij.
Deri tani nuk ka një reagim zyrtar nga Drejtoria e Përgjithshme e Burgjeve apo nga SPAK lidhur me rastin, ndërsa pritet që hetimet të sqarojnë se si telefoni ka përfunduar brenda qelisë së sigurisë së lartë, kujt i përket dhe nëse është përdorur për komunikime të paligjshme.
/vizionplus.tv
