Ministri i Drejtësisë, Toni Gogu, ka folur për procesin e hartimit të Kodit të Ri Penal, duke bërë të ditur se drafti është përgatitur nga grupi i ekspertëve dhe pritet të mbërrijë në Ministrinë e Drejtësisë për vijimin e procedurave të konsultimit.
Gogu tha se legjislacioni penal shqiptar është në një proces përafrimi me standardet evropiane dhe se Kodi Penal, ashtu si Kodi i Procedurës Penale, kërkon një vëmendje të veçantë për shkak të rëndësisë që ka në sistemin ligjor.
“Sa i përket Kodit Penal, legjislacioni ynë është në një proces përafrimi. Korpuset ligjore kanë nevojë për shumë vëmendje dhe Kodi Penal e ka marrë një të tillë. Grupi i ekspertëve ka hartuar një draft dhe ne presim që të vijë në Ministrinë e Drejtësisë me të gjitha shënimet përkatëse. Më pas do të ndjekë rrugën e konsultimit, por kjo do të marrë një vëmendje edhe më të madhe për shkak se është ligji themeltar penal. ”, tha Gogu.
Ministri theksoi se procesi do të jetë i kujdesshëm dhe nuk do të ketë nxitim për miratimin e ndryshimeve.
“Nuk duam të nxitojmë, sepse janë blloqe legjislative që duhet të qëndrojnë përballë kohës. Do të marrim kohën e duhur për të bërë më të mirën”, u shpreh ai.
Sipas Gogut, për hartimin e ndryshimeve në Kodin Penal dhe atë të Procedurës Penale kanë punuar ekspertë ndërkombëtarë nga vende anëtare të Bashkimit Evropian, në bashkëpunim me Këshillin e Evropës.
Lidhur me mungesën e 111 magjistratëve në sistemin gjyqësor, ministri Gogu deklaroi se përgjegjësia për plotësimin e vakancave i takon Këshillit të Lartë Gjyqësor, ndërsa theksoi se Shkolla e Magjistraturës ka nevojë për kohë për të përgatitur gjyqtarët e rinj.
“Mungesat në sistem janë përgjegjësi e Këshillit të Lartë Gjyqësor. Ritmi duhet të përshpejtohet. Shkolla e Magjistraturës nuk bën dot magjistratë brenda natës”, tha ai.
Gogu u shpreh optimist se në dy vitet e ardhshme do të ketë prurje të reja në sistem, falë studentëve që do të përfundojnë Shkollën e Magjistraturës.
“Në dy vitet e ardhshme do të kemi një prurje magjistratësh të rinj. Me ata të vitit që vjen dhe me vitin pasardhës, besoj se Shkolla e Magjistraturës e kryen detyrën e vet. Jam shpresëplotë se kjo do të ndodhë në momentin që institucionet rrisin ritmin”, përfundoi ministri i Drejtësisë.
