Guvernatori i Bankës së Shqiëprisë, Gent Sejko zhvilloi këtë të enjte një takim në Uashington me Shefin e ri të Misionit të FMN-së për Shqipërinë, Diego Cerdeiro.
Siç bëhet me dije përmes një njoftimi, Sejko prezantoi gjatë takimit një analizë të situatës më të fundit ekonomike dhe financiare në vend, si dhe projeksionet për të ardhmen.
“Ekonomia shqiptare vijon të shfaqë ritme të qëndrueshme rritjeje, e mbështetur nga një treg pune i fortë, inflacion i ulët, si dhe një sistem financiar i shëndetshëm. Megjithatë, pasiguritë në mjedisin ndërkombëtar, veçanërisht zhvillimet në Lindjen e Mesme, mbeten faktorë që kërkojnë vëmendje të shtuar”,theksoi Sejko.
Gjatë këtij takimi u nënvizua rëndësia e politikave të kujdesshme makroekonomike, për ruajtjen e stabilitetit të çmimeve, forcimin e qëndrueshmërisë financiare dhe uljen graduale të borxhit publik.
