Më shumë se 100 mijë vetë i dhanë lamtumirën Papa Benediktit të 16 në ceremoninë e zhvilluar në sheshin Shën Pjetër në Vatikan.
Ceremonia u udhëhoq nga Papa Françesku ndërsa besimtarët katolikë recituan pjesë nga Ungjilli për nder të Benediktit.
Në homazhe morën pjesë figura të larta shtetërore si nga Italia ashtu dhe nga Gjermania, që është vendlindja e Papa Benediktit.
Presidenti italian Sergio Matarella dhe ai gjerman Frank-Walter Steinmeier ishin mes pjesëmarrësve.
Papa Emeritus Benedikti XVI, emri i vërtetë i të cili ishte Joseph Ratzinger ndërroi jetë në natën e ndërrimit të viteve në moshën 95-vjeçare.
Ai ishte teolog gjerman, i cili bëri histori duke u tërhequr nga drejtimi i Kishës Katolike, për herë të parë pas 600 vitesh, për shkaqe shëndetësore.
Benedikti u zgjodh Papë më 2005 në moshën 78-vjeçare dhe u bë Papa më i vjetër në krye të Vatikanit.
Ai udhëhoqi Kishën katolike për pothuajse tetë vjet dhe më 2013 dha dorëheqje, gjë të cilën e kishte bërë për herë të fundit Gregori XII në vitin 1415.
Trupi i tij do të prehet në varrezat që gjenden nën bazilikë, ku ndodhet edhe varri i Papa Gjon Palit II.
