Një marshim për shkencën. Ishte kjo protesta e shtrirë në disa kontinente, SHBA, Europë e Australi e që përkoi me Ditën e Tokës. Synimi ishte mbështetja e shkencës dhe kërkimeve shkencore. Ishte paralajmërimi i presidentit Donald Trump për shkurtimin e fondeve buxhetore për agjencitë që mbështesin punën shkencore, që i çoi amerikanët të organizojnë këtë protestë. Sipas tyre, politikbërësit po shpërfillin faktet dhe kërkimet në disa fusha, përfshirë edhe ndryshimet e klimës.
“Besoj se Trump është i rrezikshëm dhe më tmerron. Do te protestoj sa herë që të kem mundësi, që tani e derisa të largohet”, tha një protestuese, ndërsa një tjetër u shpreh: “Amerikanët duhet të protestojnë për shkencën, kur kemi një qeveri kundër shkencës dhe kundër fakteve.”
Rreth 600 marshime u zhvilluan në SHBA, Francë, Britani, Gjermani e Holandë. Manifestuesit bënë thirrje që qeveritë te inkurajojnë kërkimet shkencore dhe të marrin parasysh ekspertizën shkencore.
