Rreth 2 mijë fansa u mblodhën para Katedrales së Funchalit në Madeira, të bindur se aty do të zhvillohej dasma e Cristiano Ronaldos dhe partneres së tij, Georgina Rodríguez. Thashethemet për martesën e yllit portugez kishin marrë përmasa të mëdha në rrjetet sociale.
Por turma mbeti e befasuar kur në kishë mbërritën Fabio Ramos dhe Fatima Nicole Cunha Teixeira, një çift portugez nga Madeira që jeton në Francë. Ata ishin çifti që do të martohej atë ditë, ndërsa fansat i kishin ngatërruar me Ronaldon dhe Georginën.
Nusja Fatima u detyrua të kalonte mes turmës së njerëzve që prisnin me padurim të shihnin Georginën. Disa fansa mbanin veshur fanellat me numrin 7 të Ronaldos, ndërsa nga turma dëgjoheshin edhe thirrje si: “Kjo nuk është Georgina!” Pamjet e kaosit u përhapën me shpejtësi në rrjetet sociale.
Cientos de personas se reúnen fuera de la Catedral de Funchal, creyendo que Cristiano Ronaldo y Georgina están dentro 🤯
Pero en realidad es la boda de otra pareja 💍 pic.twitter.com/GebzMIr09j
— Arielipillo (@arielipillo) August 8, 2026
Videoja u pa edhe nga vetë Cristiano Ronaldo në Instagram, i cili reagoi me disa emoji duke qeshur. Një prej të ftuarve në dasmë e përshkroi situatën si “të çmendur”, duke thënë se nusja ishte shqetësuar se gjithë kjo rrëmujë mund t’i prishte ditën e saj të veçantë.
Megjithatë, thashethemet për një martesë të Ronaldos nuk u shuan plotësisht. Motra e futbollistit, Katia Aveiro, publikoi pamje nga mbërritja e saj në Madeira, duke thënë se kishte ardhur për një “festë”. Ndërkohë, mediat raportuan se Ronaldo mund të kishte rezervuar dy katet e sipërme të një seksioni ekskluziv të hotelit luksoz Savoy Palace.
Prifti i Katedrales së Funchalit, Marcos Gonçalves, konfirmoi se e vetmja dasmë e zhvilluar aty atë ditë ishte ajo e çiftit Fabio Ramos dhe Fatima Nicole Cunha Teixeira, duke mohuar se kishte një rezervim për Cristiano Ronaldon. Ronaldo dhe Georgina u fejuan në gusht të vitit të kaluar dhe, deri tani, çifti nuk ka konfirmuar zyrtarisht një datë martese.
/vizionplus.tv
