Forcat e Ndërhyrjes së Shpejtë dhe RENEA po kryejnë kontrolle intensive pranë varrezave në qytetin e Korçës, vend ku dyshohet se është parë për herë të fundit Kristjan Sterjo, autori i dyshuar i vrasjes së 20-vjeçarit Johan Zuko.
Forcat elitë të Shqipërisë ndodhen në vendngjarje, për shkak se autori i dyshuar i krimit konsiderohet si person mjaft i rrezikshëm, si dhe është i armatosur.
Kujtojmë se pasditen e kësaj të shtune, qyteti juglindor u trondit nga breshëria e kallashnikovit, ku 20-vjeçari Johan Zuko u vra me kallashnikov nga shoku i tij i fëmijërisë, Kristjan Sterjo.
Më herët, për ngjarjen reagoi edhe Policia e Korçës, e cila informoi se konflikti mes të rinjve kishte ditë që kishte nisur, ndërsa ditën e sotme kishte agravuar.
“Rreth orës 16:30, në lagjen 15 të qytetit të Korçës, kemi marrë njoftim për një ngjarje kriminale të ndodhur. Ka agravuar me një viktimë me inicialet J.Z. Kemi person të dyshuar, që jemi vënë në ndjekje. Konflikti ka ndodhur rreth orës 14:00, në afërsi të një lagjeje tjetër, më pas precipitoi në afërsi të banesës së viktimës, ku kemi pasur përdorimin e armëve të zjarrit. Më pas, autori është parë nga dëshmitarë duke u ngjitur rreth 15 minuta në drejtim të varrezave. Jemi në ndjekje të tij. Viktima është vrarë me armë kallashnikov, ndërsa viktima ka pasur në dorë një thikë. Konflikti ka qenë i mbartur prej kohësh, sot precipitoi”, tha zv.drejtori i Hetimit të Krimeve në Korçë, Sejfulla Metko.
