Ministri në detyrë për Evropën dhe Punët e Jashtme, Gent Cakaj gjatë vizitës në Bujanoc u takua edhe me krerët e Këshillit Kombëtar Shqiptar. Në fokus të takimit ishin diskutime të lidhura me gjendjen e shqiptarëve në Luginë dhe me shqyrtimin e mundësive të mbështetjes së tyre.
Kryediplomati Cakaj, në një reagim në facebook bëri me dije se po punohet për të përpiluar një plan të përbashkët veprimi, për të ndihmuar disa sektorë kyç për Luginën e Preshevës.
“Këtu më duhet të falënderoj gjithsesi Kryetarin e Këshillit, Ragmi Mustafa, për punën e pakursyer e bashkëpunimin e vazhdueshëm në këtë drejtim”, u shpreh Cakaj në postim.
Gjatë takimit, Kreut të Diplomacisë shqiptare iu dhurua nga Këshilli Kombëtar Shqiptar një Çertifikatë në shenjë mirënjohje për mbështetjen dhe qasjen proaktive ndaj shqiptarëve të Luginës së Preshevës.
“Mbetem pafundësisht falënderues për mirënjohjen që na ndau Këshilli për punën që kemi bërë për Luginën”, përfundoi Cakaj.
