Liderja e ndaluar e Mianmarit dhe fituesja e Çmimit Nobel për Paqe, Aung San Suu Kyi, është takuar me një përfaqësues të Komitetit Ndërkombëtar të Kryqit të Kuq (ICRC), në atë që duket të jetë paraqitja e saj e parë publike me një zyrtar të huaj prej disa vitesh. Takimi vjen pas shqetësimeve të shumta ndërkombëtare për gjendjen e saj shëndetësore.
Sipas qeverisë së mbështetur nga ushtria, Suu Kyi u takua me përfaqësuesin rezident të ICRC-së në Mianmar. Një fotografi e publikuar nga autoritetet e tregon 81-vjeçaren të veshur me veshje tradicionale burmeze, duke buzëqeshur dhe duke shtrënguar duart me zyrtarin në një ambient të thjeshtë me dysheme dhe mure prej druri.
Suu Kyi, e cila për dekada ka qenë simboli i rezistencës ndaj sundimit ushtarak në Mianmar, mbahet në izolim që prej grushtit të shtetit të vitit 2021, kur ushtria rrëzoi qeverinë civile që ajo drejtonte. Që prej asaj kohe, autoritetet kanë mbajtur të fshehtë vendndodhjen dhe gjendjen e saj, ndërsa vendi është përfshirë nga një luftë civile që ka shkaktuar mijëra viktima dhe miliona persona të zhvendosur.
Takimi u zhvillua pas një fushate të nisur nga djali i saj, Kim Aris, i cili kërkoi prova se nëna e tij ishte ende gjallë dhe shprehu shqetësim për përkeqësimin e mundshëm të shëndetit të saj. Ndërkohë, janë publikuar edhe fotografi të tjera ku Suu Kyi shfaqet duke festuar ditëlindjen e saj të 81-të, por autenticiteti i tyre nuk është verifikuar në mënyrë të pavarur.
Aung San Suu Kyi po vuan një dënim prej 27 vitesh burg pas një procesi gjyqësor të zhvilluar me dyer të mbyllura, për akuza që variojnë nga shkelja e kufizimeve të COVID-19 deri te korrupsioni dhe nxitja kundër ushtrisë. Kritikët e kanë cilësuar procesin si politik dhe të drejtuar për ta larguar atë nga skena politike.
Analistët vlerësojnë se zgjedhja e një përfaqësuesi të Kryqit të Kuq për takimin e parë publik me Suu Kyi mund të jetë një përpjekje e juntës për të adresuar shqetësimet mbi gjendjen e saj pa lejuar ende akses të gjerë diplomatik. Ndërkohë, komuniteti ndërkombëtar vijon të kërkojë më shumë transparencë për fatin dhe të ardhmen e ish-lideres së Mianmarit.
/vizionplus.tv
