Policia e Durrësit ka finalizuar operacionin e koduar “July”, në kuadër të të cilit janë zbardhur gjashtë raste vjedhjesh dhe tentativash për vjedhje të kryera gjatë muajit korrik 2026.
Si rezultat i veprimeve intensive hetimore të specialistëve për Hetimin e Krimeve në Komisariatin e Policisë Durrës, është identifikuar dhe arrestuar autori i dyshuar, shtetasi I. D., 44 vjeç, banues në Durrës.
Sipas hetimeve, ai dyshohet se gjatë periudhës 14-24 korrik 2026 ka kryer një sërë vjedhjesh, duke marrë një motoçikletë, një çantë me sende personale dhe një portofol, si dhe ka vjedhur para dhe materiale në dy subjekte tregtare. Gjithashtu, ai dyshohet se ka tentuar të kryejë një vjedhje në një banesë.
Policia bën me dije se hetimet vijojnë për të verifikuar përfshirjen e 44-vjeçarit edhe në raste të tjera vjedhjesh të ndodhura në qytet.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme procedurale.
