Është nxjerrë nga thellësia e minierës së Tërnovës në Bulqizë trupi i pajetë i minatorit 40-vjeçar, Ilir Kalaveri, i cili humbi jetën pas një aksidenti tragjik në vendin e punës.
Ngjarja ndodhi mesditën e së shtunës, kur 40-vjeçari, banues në Burrel dhe i punësuar në një subjekt privat minerar, ra në një furnelë gjatë procesit të punës, duke mbetur i mbuluar nga masa e kromit.
Menjëherë pas aksidentit u angazhuan grupet e kërkim-shpëtimit, shërbimet e Policisë dhe ekipet e emergjencës, të cilat punuan për disa orë për lokalizimin dhe nxjerrjen e minatorit. Pavarësisht përpjekjeve, ai u gjet pa shenja jete.
Trupi i pajetë u nxor nga galeria, ndërsa grupi hetimor ka nisur veprimet për të zbardhur shkaqet dhe rrethanat e plota të aksidentit. Autoritetet pritet të përcaktojnë nëse janë respektuar rregullat e sigurisë teknike në minierë dhe përgjegjësitë që lidhen me këtë ngjarje të rëndë.
“Në vijim të informacionit paraprak të dhënë ditën e djeshme, bëjmë me dije se, pas kërkimeve intensive të kryera nga ekipet e kërkim-shpëtimit, shërbimet e Policisë dhe personeli teknik i subjektit minerar ku ndodhi aksidenti, u bë e mundur gjetja dhe nxjerrja e trupit të pajetë të shtetasit I. K., 40 vjeç, banues në Klos, i cili kishte rënë në një furnel gjatë procesit të punës, në vendin e quajtur Tërnovë e Madhe, bashkia Bulqizë, dhe mbeti i bllokuar nga materiali i kromit.
Trupi i pajetë do të transportohet në Institutin e Mjekësisë Ligjore, Tiranë, për kryerjen e ekspertimit mjekoligjor.
Grupi hetimor, në drejtimin e Prokurorisë, vijon veprimet procedurale për dokumentimin dhe sqarimin e plotë të rrethanave të kësaj ngjarjeje”, njoftoi policia.
