Zjarrfikësit luftuan gjatë gjithë natës deri në orët e para të së hënës me një zjarr të madh pyjor në pjesën perëndimore të Atikës në Athinë, duke u përqendruar në dy vatra ende aktive, ndërsa autoritetet po hetojnë përplasjen në ajër të dy helikopterëve zjarrfikës, ku humbën jetën dy anëtarë të ekuipazhit.
Zjarri vijon ende në zonat Agios Nektarios dhe Kandili në Megara ku ekipet punuan gjatë gjithë natës për të vënë nën kontroll riaktivizimet e vazhdueshme të flakëve.
Pak para agimit, autoritetet dërguan mesazhe emergjence në telefonat celularë të banorëve, duke urdhëruar evakuimin e Agia Skepi, Kandili dhe Botsika drejt qytetit bregdetar të afërt, Nea Peramos. Më herët, ishte urdhëruar edhe evakuimi i banorëve të Loumba, Ano Alepochori, Morfeika dhe Stanes Morfa drejt Megarës. Nga flakët janë dëmtuar edhe disa shtëpi, por numri i saktë i tyre ende nuk është bërë publike.
Gjatë natës, zjarrfikësit përdorën buldozerë dhe mjete të tjera të rënda për të hapur breza mbrojtës kundër zjarrit, në përpjekje për të ngadalësuar përhapjen e flakëve. Kushtet mbetën veçanërisht të vështira në zonën e Loumbës, pranë qytetit të Vilias.
Ky zjarr vjen vetëm një ditë pasi dy helikopterë zjarrfikës të marrë me qira, të tipit Bell, u përplasën gjatë operacioneve mbi zonën bregdetare të Psathës, në Atikën Perëndimore. Si pasojë e aksidentit humbën jetën një pilot danez dhe një koordinator grek i operacioneve ajrore, të cilët ndodheshin në njërin prej helikopterëve.
Policia njoftoi të hënën se, me urdhër të prokurorit, i është ngarkuar hetimi i rrethanave dhe shkaqeve të përplasjes. Sipas autoriteteve, vendi i aksidentit është izoluar, ndërsa hetuesit po zhvillojnë hetimet paraprake.
