Qeveria britanike njoftoi të hënën një paketë të re prej 100 sanksionesh ndaj Rusisë, në përgjigje të sulmeve intensive me dronë që Moska kreu gjatë fundjavës në qytetet ukrainase – një nga goditjet më të mëdha ajrore që nga fillimi i luftës.
Sanksionet e reja synojnë sektorët kyç të makinës ushtarake dhe ekonomike ruse, përfshirë zinxhirët e furnizimit për prodhimin e raketave Iskander, operacionet e propagandës të mbështetura nga Kremlini, institucionet financiare që ndihmojnë në shmangien e sanksioneve, si dhe cisternat e përfshira në “flotën në hije” të eksportit të naftës.
Sekretari i Jashtëm britanik, David Lammy, i bëri thirrje presidentit rus Vladimir Putin të pranojë menjëherë një armëpushim pa kushte, për të mundësuar bisedime për paqe. “Sa më shumë vonohet paqja, aq më shumë ne do të forcojmë përkushtimin tonë për të mbështetur Ukrainën dhe për të goditur kapacitetet ushtarake të Rusisë,” deklaroi ai.
/vizionplus.tv
