Vijon operacioni i Policisë së Tiranës dhe Krujës për evidentimin dhe goditjen e parcelave të kultivuara me kanabis në zonat malore të Krujës.
Sipas të dhënave paraprake, deri më tani janë asgjësuar rreth 5 mijë rrënjë kanabis, të cilat janë gjetur të kultivuara në afro 100 parcela të ndryshme. Çdo parcelë përmbante nga 50 deri në 100 bimë narkotike.
Burime nga grupi hetimor bëjnë me dije se deri në këtë fazë të operacionit nuk ka persona të arrestuar. Megjithatë, policia ka identifikuar disa persona që dyshohet se posedonin dhe administronin parcelat me kanabis, të cilët janë shpallur në kërkim.
Në terren janë angazhuar 15 grupe të efektivëve të policisë, të cilët po kryejnë kontrolle intensive në zonat e thella malore, me qëllim zbulimin dhe asgjësimin e parcelave të tjera të mundshme.
Aksioni pritet të vijojë edhe në ditët në vijim, ndërsa autoritetet synojnë jo vetëm shkatërrimin e bimëve narkotike, por edhe identifikimin, lokalizimin dhe vënien para përgjegjësisë ligjore të personave të përfshirë në kultivimin e tyre.
/vizionplus.tv
