Presidenti i Serbisë Aleksandër Vuçiç ka bërë një tjetër deklaratë, pas reagimit të Komisionit Evropian, bërë më herët ndaj deklaratave të tij për ndryshimin e rrjedhës së lumit Ibër.
Gjatë vizitës së tij në Arije, Vuçiç tha se reagimet nga Komisioni Europian munguan ndaj asaj që ai e cilësoi ‘dështimit të formimit të ZSO-së (bashkësisë së komunave serbe në Kosovë), si dhe ndaj arrestimeve dhe keqtrajtimit të përditshëm të serbëve në Kosovë’.
Sipas Vuçiç deklaratat e tij për ndryshimin e rrjedhës së ujit “nuk mbështesin qëllimin e normalizimit të marrëdhënieve” midis Kosovës dhe Serbisë dhe se kjo mund të arrihet vetëm përmes dialogut, Presidenti pyeti nëse po i referohej dialogut për të cilin “BE-ja ka vënë nënshkrimin e saj, por të cilin nuk e respekton”
“A e keni fjalën për dialogun që nënshkruat edhe për formimin e Bashkësisë së Komunave Serbe, a e keni fjalën për atë dialog? Apo e keni fjalën për mungesën e dialogut dhe reagimet tuaja ndaj arrestimeve të përditshme të serbëve, keqtrajtimit të përditshëm të serbëve, persekutimit të përditshëm të serbëve, prishjes së shtëpive serbe, a e keni fjalën për këtë? Dhe pastaj ju kujtuat nëse dikush do t’i ndryshonte apo jo rrjedhën e ujit”, tha Vuçiç.
Ai deklaroi se ndryshimi i mundshëm i rrjedhës së lumit Ibër është ende larg dhe se duhet të formohet një grup pune dhe të gjenden ekspertë për ta realizuar këtë.
“Ne tashmë kemi disa ekspertë, na duhen edhe të tjerë, kështu që le të shohim se çfarë do të bëjmë dhe si do ta bëjmë. Por ata reaguan menjëherë ndaj kësaj, për të mbrojtur ‘shërbëtorët e tyre shqiptarë’ dhe për t’u thënë edhe një herë: vazhdoni të kryeni krime”, theksoi Vuçiç.
