Presidenti ukrainas Volodymyr Zelensky ka paralajmëruar se Rusia mund të nisë një valë të re mobilizimi gjatë vjeshtës, pasi sipas tij Kievi disponon dokumente të brendshme ruse që tregojnë për përgatitjen e këtij plani.
Sipas Zelenskyt, mobilizimi mund të nisë menjëherë pas zgjedhjeve parlamentare në Rusi, të cilat ai i ka cilësuar si të manipuluara.
Presidenti ukrainas deklaroi se objektivi i Moskës është të rekrutojë disa qindra mijëra persona për t’i dërguar në front deri në fund të këtij viti, ndërsa një numër të ngjashëm edhe gjatë vitit të ardhshëm.
“Kjo është përveç objektivave të rekrutimit që ata po përpiqen t’i përmbushin përmes kontratave ushtarake”, tha Zelensky në fjalimin e tij të mbrëmjes.
Ai bëri të ditur gjithashtu se shërbimet ukrainase të inteligjencës dhe sigurisë kanë marrë udhëzime për të ndërmarrë çdo masë të mundshme për të penguar zbatimin e këtij plani nga Moska.
Ndërkohë, Kremlini nuk ka njoftuar zyrtarisht deri tani për një mobilizim të ri të përgjithshëm.
