Presidenti i Kinës, Xi Jinping, ka rikthyer në qendër të debatit ndërkombëtar teorinë e njohur si “Kurthi i Tukididit”, gjatë takimit të zhvilluar në Pekin me presidentin amerikan Donald Trump.
Deklarata e liderit kinez vjen në një moment tensionesh të forta mes dy ekonomive më të mëdha të botës, ndërsa rivaliteti mes Pekinit dhe Uashingtonit vazhdon të dominojë skenën globale.
“A munden Kina dhe Shtetet e Bashkuara të shmangin Kurthin e Tukididit dhe të krijojnë një model të ri marrëdhëniesh mes fuqive të mëdha?”, u shpreh Xi Jinping para nisjes së bisedimeve me Trumpin.
Presidenti kinez theksoi se të dy vendet duhet të bashkëpunojnë përballë sfidave globale dhe të kontribuojnë për më shumë stabilitet në botë.
Çfarë është “Kurthi i Tukididit”?
Termi është bërë shumë i njohur në politikën ndërkombëtare vitet e fundit dhe përdoret për të përshkruar rrezikun e konfliktit mes një fuqie në ngritje dhe një superfuqie ekzistuese.
Teoria u bë e famshme nga politologu amerikan Graham T. Allison, profesor në Universitetin e Harvardit, i cili u bazua në veprën e historianit të lashtë grek Thucydides.
Në librin e tij “Destined for War”, Allison argumenton se ngritja e Kinës dhe frika që kjo krijon te SHBA mund të çojnë në një përplasje të rrezikshme, njësoj si rivaliteti historik mes Athinës dhe Spartës.
Sipas teorisë, kur një fuqi e re sfidon dominimin e një fuqie ekzistuese, rreziku i luftës rritet ndjeshëm. Megjithatë, Allison ka theksuar se konflikti nuk është i pashmangshëm.
NOW – Xi: “Currently, transformation not seen in a century is accelerating across the globe and the international situation is fluid and turbulent. The world has come to a new crossroads.” pic.twitter.com/iDz4eHoaV9
— Disclose.tv (@disclosetv) May 14, 2026
Mesazhi politik i Pekinit
Analistët vlerësojnë se përdorimi i kësaj reference historike nga Xi Jinping nuk ishte rastësor.
Përmes këtij mesazhi, Kina synon të tregojë se rivaliteti me SHBA-në nuk duhet të shndërrohet në konflikt të hapur, por të menaxhohet përmes diplomacisë dhe dialogut.
“Bashkëpunimi i sjell përfitime të dyja palëve, ndërsa konflikti dëmton të dyja vendet. Ne duhet të jemi partnerë dhe jo kundërshtarë”, deklaroi Xi pas mbërritjes së Trumpit në Pekin.
Takimi mes dy liderëve po ndiqet me interes të madh nga komuniteti ndërkombëtar, për shkak të ndikimit që marrëdhëniet SHBA-Kinë kanë në ekonominë dhe sigurinë globale.
