Eksperti i ekonomisë, Azmi Stringa, ka ngritur alarmin për nivelin e lartë të çmimeve në Shqipëri, të cilat sot kanë arritur mesatarisht 100% të nivelit të Bashkimit Europian, ndërkohë që të ardhurat për frymë në vend mbeten më pak se një e treta e mesatares së BE-së.
Në një intervistë me moderatoren Pranvera Borakaj, Stringa theksoi se shqiptarët përballen me çmime më të larta se vende si Spanja dhe Hollanda, ndërkohë që rritja e kostove vijon prej vitesh, edhe para pandemisë.
Sipas tij, Shqipëria ndjek në mënyrë “perfekte” trendin e rritjes së çmimeve në BE, por çdo rritje europiane reflektohet edhe më fort në tregun vendas.
Shkaku, sipas ekspertit, lidhet me problemet strukturore të ekonomisë, përfshirë shkatërrimin e bujqësisë dhe mungesën e një tregu të qëndrueshëm.
Ndërkohë, kursi i këmbimit ka rënë me 35%, duke e bërë situatën edhe më të rëndë për konsumatorin shqiptar.
Pjesë nga biseda:
Stringa: Shqipëria ka kapur nivelin e çmimeve sot sa 100% e BE-së. Pra, çmimet e shportës së ushqimeve janë sa 100% e Bashkimit Europian. Ndërkohë, ne të ardhurat për frymë s’i kemi aq. S’kemi asnjë të tretën e atyre.
Borakaj: Pra, ne kemi 1/3-ën e të ardhurave të BE-së për frymë, dhe kemi çmimet njësoj.
Stringa: Kemi shkuar më shtrenjtë se Spanja, më shtrenjtë se Hollanda. Kjo tregon një fenomen shumë interesant. Ne e ndjekim trendin e BE-së në mënyrë perfekte. Në mënyrë perfekte. Po ama, kur rritet atje me një lek, ne e kemi rritur me dy lekë këtu. Pra, gjithmonë shqiptari mban atë diferencë që tregon edhe problemet tona të brendshme të tregut tonë. Kjo mund të vijë nga fakti që kemi shkatërruar bujqësinë dhe produktet, sepse dhe ajo na mban.
Borakaj: Dua të ndalem edhe tek bujqësia.
Stringa: Dhe e dyta, ka një gjë tjetër që duhet ta theksoj rritja e çmimeve në Shqipëri nuk ka ndodhur vetëm në fazën e pandemisë, ka ndodhur edhe përpara pandemisë. Pra, kjo tregon që ne kemi pasur një rritje çmimesh konstante, ndryshe nga vendet e tjera të rajonit. Dhe mbani parasysh që, paralelisht, kursi i këmbimit ka rënë me 35%.
/vizionplus.tv
